PDK-XOYBUN; wiha, di xizmeta, Kurd û Kurdistanê daye : Pirojeya Kurdistana Mezin, Pirojeyên Aborî û Avakirin, Pirojeyên Cand û Huner, Lêkolîna Dîroka Kurdistanê, Perwerdeya Zimanê Kurdî, Perwerdeya Zanîn û Sîyasî, Weşana Malper û TV yên Kurdistane.

Nivîskar, wêjezan, dîrokzan, rojnamevan, pûblîsîst û wergêrê bi nav û deng, Wezîrê Eşo, di temenê 81-salîya xwe da, di 23.01.2015 de, li bajarê Brûksêlê (Bêlçîka) çû li ser dilovanîya xwe. Wezîrê Eşo yê Hûtî, 1ê mijdara sala 1934an li payîtextê Gurcistanê-Tivlîsê, ji Dayik buye. Wezîrê Eşo, Xwendin-perwerda xwe ya destpêkê, di dibistana gundê xwe – Pampê (niha Sîpan li herêma Ermenîstanê ya Aragasotinê) û ya Tivlîsê ya jimara 23an da bi giranî bi zimanê Ermenî bi cî aniye. Sala 1958a fakûltêta (beşa) Zanîngeha payîtextê Ermenîstanê – Yêrêvanê ya dîrokê xilas kiriye. Serê Endamên Malbata, Wezîrê Eşo û serê heval û hogirên wî, serê Netewa Kurd, sax be...

Partîya Demokrat a Kurdistan — Xoybun

P D K — XOYBUN

01.11.1934 — 23.01.2023

Ez, li ser navê Malpera ; www.pdk-xoybun.com ê, www.xoybun.com ê û li ser navê Partîya Demokrat a Kurdistan — Xoybun ( P D K — XOYBUN ) ê, Wezîrê Eşo yê Hûtî, bi Dilekî germ, bibîr tînim. Wezîrê Eşo, wekê her Tekoşer û Şehîdên Kurdistanê, nemire û Dilê meda dijî. Şehîdên Kurdistanê, yên berîya vê demê û yên hetanê îro, bi bîr tînim û tevkujînên, li hemberê Kurda, li Kurdistanê û yên li dervayê Kurdistanê buye, hemuyan, Şermezar dikim...

Kurdistanîyên Hêja :

Ey qehremanên Kurdistan ê, hun herdem di dilê meda dijîn.
Qehremanên Şoreşa Kurdistan ê Nemir in ! ...

Partîya Demokrat a Kurdistan — Xoybun

P D K — XOYBUN

Tekoşîna Şoreşgeran Herdem Dibê, Mirina Koledarî û Terorîzma Dagirkerên Kurdistan ê.
Bijî Kurdistanek Yekgirtî, Serbixwa û Azad

______________________________________

Wezîrê Eșo wefet kir.

Caweke pir xemgîn iro gihîște min. Dijwere wê rastiyê ra qayîl bim, ku hogirê minî qelemê, ku eva devedevî niv sedsale em rêkê da bi hevra dimeșin û van sale dewyê heftêk tunebû me bi seheta hevra xeber neda xatirê xwe ji me dixweze, dice tevî refê rewșenbîrê meye nemir yê dewra sovêtê bibe: Erebê Șemo, Qanatê Kurdo, Heciyê Cindî, Casimê Celîl, Șekroyê Xudo, Emînê Evdal, Nado Maxmûdov, Fêrîkê Ûsiv, Mîkayêlê Reșîd, Simoyê Șemo… Wê cêrgê mirov kare dirêjke. Gișk jî navên mezin û bijare. Gișka jî Wezîr hiz dikirin, gișkê jî bi hizkirin li rex xwe wê ciyê layîq bidine Wezîrê Eșo…

Wezîrê Eşo sala 1934 a, 1 ê meha mijdarê li paytextê Gurcistanê: bajarê Tilbîsê da hatibû dinê. Pêşyên nivîskar destpêka salên 80 î sedsala 19 an ji ber zulm û zora dewleta Osmaniyê û olperestên êlêye fanatîk ji Eleşgirê ( E´yntap ji navça wan ra digotn) ji êla xwe ya Sîpka diqetin û bi dijwerî direvn e navça Dîgorê li qeza Qersê. Wê demê ew herem êdî di bin bandora desthiletdariya Împêratoriya Rûsiya qiraliyê da bû. Êla wan: Sîpkîên Êzdî li wî cîyê nû ji xwera gundan ava dikin. Mala kalkê Wezîr gundê Şîrikûyê da cî dibin. Ew li wê êlê da malbeteke bi nav- denge û kivş bû… Berî şerê cihanê yê ewlin kalkê wî Hûtê Begê Reşîd axa wek gilavîyê (serokê) wê êlê tê hilbijartin. Lê ev yek dirêj nakşîne. Sala 1917 an li Rûsiyayê şorişa Oktiyabirê ser dikeve. Leskerên Rûsa Pişkavkazê dihêlin, diçin. Leşkerên Osmaniyê û alayên Hemîdiyan dadikutine wê heremê. Qewatên Ermenîya têrê nakin pêşya wê lêya zalm bigrîn. Êla Sîpkan ji aliyê Osmaniya da ziyneka mezin dikşîne. Yên tên qirkirinê, yên bi teherekî ji çemê Ava Reş derbaz dibin, diçin, digîhîjne navça Elagezê kurdên Êzdî. Wê demê 12 gundên Êzdiyan li pala çîyayê Elegezê hebûn. Malbeta kalkê nivîskar Hûtî Begê gundê Pampê da cî dibin. Lê hêzên Roma reş tev Hemîdiyan tên, bi şûrê xezevê digihîjin wan gundan jî, Êzdî dikevin devê şûrê neheqiyê. Mêra, zarok, kal û pîran dikujin, gunda talan dikin, geleka hêsîr digrin, tev talên dajone kûraya Tirkyê. Malbeta wan mecbûr, direvin bajarê Tilbîsê. Wê demê Tilbîsê da jî feqîrî û nangiranî bû: tije sêwî û evdên bêxweyî.

Wura jî qeydê Sovêtê tê demezirandin. Bajêr da mektebên karkiran yên hildana nexwedîtiyê vedibin. Eşo jî wan mekteba da bi piştgiriya Kamil Beg Bedirxan (Wê demê ew lawê mala Bedirxana li bajarê Tilbîsê dijît, tevî hinek karkir û rewşenbîrên kurdan kare kurdewarî dimeşand) dixwîne, xwe pêş dixe, dibe şagirtekî Bedirxwen. Dizewice. Halê wan xweş dibe. Sala ku Wezîr tê dinê (1934 a) malbeta wan vedigerin nava qewm-pismamên xwe: Ermenistanê, gundê Pampa Kurdan. Bavê wî ewil wak berpirsiyarê kilûba gund, paşê salên dirêj wak serokê sovêta gind dixebite…

Zarotya Wezîr wî gundê Kurdayî çiyayî bedew da derbaz dibe. Pampa Kurda (niha Sîpan) li nav wê navçê da gundkî herî şên e, bi bihar û havînê xwe yên li nav kulîlkada xemilî, kerî, sûrî, berx , berodan, bindarûk, zerî-domamên çevreş, payîzên bi dewet û dîlan, zivistanên berf û boran, odên germe tije çîrok û kalên zemana. Pamp xizna zargotinê ye.

Dema Wezîrê me dinivîsî, yan li nava civakekê da diaxivî, kolorîta axaftina Pampiya dihate bîra mirov. Xeysetekî kurmancîyî, lîrîkîyî, sivik, zimanekî xweşî tije tem û şîrnayî, ruhsivikî, axaftineke maqûlî, zaroka ra zaroke, mezina ra mezin bû Wezîr me. Timê li nav şîn û şaya, mesrefa da, mîkrafon yan kasa eşqê dêst da, ber dilê evda da dihat, ku derdê wan sivikke, destanînê wan ra şabûna xwe digot, xelq pîroz dikir. Axaftina wî jî ne wek ya xelqê bû, dirêje û heftq bû. Rewşembîrekî usan bû ku nav, bi xûdana xwe, keda xwe qazanc kiribû, hela dewsa hinek rewşembirên me, nîrê wan jî kişanibû û carna li bin sîyê da mabû.

Xwendina ewlin Wezîr dibistana gundê xwe ya hevtsale da standibû, paşê bajarê Tilbîsê da mekteba navîn xilaz kiribû. Sala 1953 an beşa dîrokê ya Zanîngeha Yêrêvanê da hatibû qebûlbûn û ji pey bi serketin qedandina xwendina bilind ra gundê xwe da bûbû berpirsiyarê dibistanê.

Sala 1961 ê dice Lênîngiradê ku li ser dîroka gelê xwe bixebite û têza doktoriyê bistîne. Ew li wur kurdzan-rojhilatzanên bi nav û deng ra dibe nas, li nav dîroka gelê xwe da kûr dibe. Sala 1963 a vedigere Yêrêvanê. Sala 1964 a wî kivş dikin wek rêdaktorê sîyasî î sereke yê weşenên têlêvîziyon- radiyo û weşenxana li Ermrnistanê. Salên 1983-1994 an karê rêdaktoriye û wergervaniyê di beşa weşanên Kurdî ya Radiyoya Yêrêvanê da dike. Sala 1994 an ji sedemên taibeytî Wezîrê Eşo penaberî Bêlgîyayê dibe û heta roja xweye dewyê kar –barên xweyî rewşembîryê, zaniyaryê, nivîskariyê, welatparêziyê li bajarê Birûsêlê didomand.

***

Despêka salên 60 î, sedsala çûyî, Wezîrê Eşo jî tev Şikoyê Hesen, Mîkayêlê Reşît, Fêrîkê Ûsiv, Simoye Şemo, Sihîdê Îbo, Egîtê Xudo, Emerîkê Serdar u gelekên din ronayîke geş anî nava rojnemevanî û edebiyeta Kurdên welatê Sovêtê… Ermenistanê da ew bûne stûnên karkir û rêvabir ji bo ocaxên medeniyeta Kurdan. Salên weşena xweye ewlin heta sala 1994 a çawa para axaftinên radiyoya Kurdî ya rojane, usan jî pelên rojnema RIYA TEZE bi nivîsarên Wezîrê Eşo xemilîne…

Wezîrê Eşo di nav xwendevana da çawa nivîskarekî bi şuret û hizkirî eyane. Pirtûkên wî yên kurteçîrokan: “Mizgînî” (1976), “Dengbêj kal bûbû” (1983), “Pamp-Sîpan” (1986) û gelek efrandinê wîye din ji alyê xwendevana da hatine hizkirin. Têma efrandinê nivîskar emrê evdê kurde, Pampa wîye delal, dijweryên dîrokê, jîyana îro, hizkirin, penaberî û xerîbî, hisreta Welatê kal-bavan, pismamtî û xêrxweziya gelan… Şirovekirna wî şîrin û xweşe, bi gilyê pêşiyan, laqirdiyan, reng û rewşên hewaskar xemilandîye…

Nivîskarê hizkirî karekî mezin di aliyê wergera bedewetiyê da kirye. Xebata salaye dirêj di warê wergerê da û zanebûnên bêqisûr ya zimanên Rûsî û Ermenî mecal danê ku efraninên bedewetiyê usan wergerîne kurmancî, wekî ew ji bingehê danexin. Sala 1982 berevoka wî ya wergeran ji nivîskarên Ermenî “Xebera Dosta” hate weşendin. Bi wergera wî radyoşanoyên “Hisret”, “ Nahapêt” yên li ser hîmê romanên nivîskarê Ermeniyayî Hraçiya Koçar nivîsî, “Memê û Gulê” ya nivîskarê Kurd Nado Maxmûdov salên başqe-başqe bi zimanê Kurdî Radiyoya Yêrêvanê da hatine dayîn. Wezîrê Eşo usa jî yek ji wergerê berevokên efrandinên nivîskarên Ermeniya yên mezin H. Tûmaniyan û A.Îsahakiyan e.

Li ber dilê min da xebateke wî ya giranbha Xaçatûr Aboviyan u lêkolînê wî KURD û ÊZDÎ ye, ku sala 1986 li Yêrêvanê hate weşandin. Xaçatûr Aboviyan, dost û xêrxwezê gelê Kurd hîmdarê Edebiyeta Ermeniya ya nû ye. Ew salên 40 î sedsala nonzdan çûye li nav êlên Kurdan û ev herd gotarên giranbiha nivîsîne, weşendiye. Wezîrê Eşo ne ku tenê ew gotarên giranbiha wergerandine Kurdî lê lêkolîneke pir kûr, bi nirx û delal derberê wan û nivîskarê wan da weşandiye û daye xwendevanên xwe…

Ji bo emekê wî yê mezin, sala 1991 ê ji alyê yekîtya Nivîskarên Ermenyan va ew hêjayî xelata hurmetê ya ser navê Erebê Şemo bû.

Radyoşanoyên wî “Koçekê Derewîn” û “ Tîgran û Mehmûd” ji aliyê guhdarê radiyoyê va gelekî baş hatine qebûlbûn lê komêdya “Remo, Şemo, Temo…” salên 70 î ,demeke dirêj ji ser dika tîatroya Elegezê ya gelêrî nedihate xar…

Wezîrê Eşo karne mezin kirye di warê rojnemevanyê, rêdaktorya pirtûkan da. Ber qelema wî bi hezara qise, nûçe, miqale, heypîvan, gotarên hewaskar derketine. Wî pêşgotinên dor deh pirtûkên nivîskar, helbestvan û zanyarên kurd nivîsye yên wek Hecîyê Cindî, Casimê Celîl, Fêrîkê Ûsiv, Simoyê Şemo, Şemsî û yên din.

Ew endemê Yekîtya Nivîskar û Rojnemevanê welatê Sovêtê bû, dewsgirtiyê sedrê yekîtiya rewşembirên Kurd yên Ermenistanê…

Ji pey penaberyê ra jî Wezîr rehet rûneniştye. Berê qelema wî hê adan bûye. Sala 2007 a li Hewlêrê pirtûka wî: “Dosya Barzanî Sandoqa Stalîn ya pola da” hate weşandin. Ew pirtûk, bi wergera dr. Îsmayîl Hesaf salek peyra bi zimanê erebî dîsa li Hewlêrê hate weşandin.

Sala 2008 li Başûrê Kurdistanê pirtûka wî ya novella “Paryê Berdamayî” bû male xwendevana. Vê berevoka novella da bi cure bîranîna nivîskar vegeryaye berbi koka xwe, jiyana kal bava û girêdana xwe bi wî emrê derbasbûyî, wan evdên hizkirî ra. Berevok serketîye û bi hizkirin tê xwendin.

Monogirafiya wîye ser jîyan, kar û berhemên Qanatê Kurdo, ku van axriya hate weșendin xebateke pir bi qîmet e derheqa Rojhilatzanê mezin da.

***

Vê dewyê, dema pîrozkirina 80 salya wî, pașê jî seva roja sala nû, me dirêj hevra xeber da. Gelekî ji bo nivîsarên xweye neweșandî dikewgirî. Keça wî Mîdiya xûșik jî hazir bû. Gelekî kêfxweș bû dema min gotê Kovara Navenda Lêkolînên Êzdînasyê hejmara ewlin hatiye weșendin û wegera wîye pir hêja, gotarên Xaçatûr Abovyan “Kurd û Êzdî” bi temamî hatye weșandin. Emê zûtirekê jêra bișînin. Çendek pêșda Leyla Çildergûșî hatibû Mala Êzdiyan Oldênbûrgê, min kovar jêra șand, lê sed heyf Wezîr êdî nexweșxanê bû.

Wezîrê Eșo wê tim dilê heval-hoger, xwendevan û gelê xwe da bimîne.

Esker Boyik, 23.01.2015

______________________________________

Wezîrê Eșo wefet kir.

NIVÎSKAR Û ROJNAMEVANÊ NAVDAR
WEZÎRÊ EŞO ÇÛ LI SER DILOVANÎYA XWE.

Nivîskar, wêjezan, dîrokzan, rojnamevan-pûblîsîst û wergêrê bi nav û deng Wezîrê Eşo, di temenê 81-salîya xwe da li bajarê Brûksêlê (Bêlçîka) çû li ser dilovanîya xwe. Çanda meye netewî zîyaneke mezin kişand.

Wezîrê Eşo yê Hûtî 1ê mijdara sala 1934an li payîtextê Gurcistanê-Tivlîsê hatiye cîhanê. Xwendin-perwerda xwe ya destpêkê di dibistana gundê xwe – Pampê (niha Sîpan li herêma Ermenîstanê ya Aragasotinê) û ya Tivlîsê ya jimara 23an da bi giranî bi zimanê ermenî bi cî aniye. Sala 1958a fakûltêta (beşa) Zanîngeha payîtextê Ermenîstanê – Yêrêvanê ya dîrokê xilas kiriye. Salên 1958-1961ê weke serokê dibistana gundê xwe – Pampê (li nawça Axbaranê) kar kiriye. Salên 1961-1963an li Lênîngiradê (niha Pêtêrsbûrg) beşa kurdzaniyê da ya Înstîtûta Rojhilatzaniyê, bûye pisporê dîroka Kurdistanê. Salên 1964-1994a wek rêdaktor, serrastkir û kontrolkirekî çapemeniya Ermenîstanê yê sereke, her usa jî wek rêdaktor-wergêrê beşa weşanên bi kurdî ya Radiyoya Ermenîstanê li Yêrêvanê kar û barên xwe bi cî anîne. Ji sala 1995a hetanî naha li Payîtextê Bêlcîka-Brûksêlê dima û diafirand.

Wek nivîskar berhemên wî di rojnameya kurdî ya «Riya Teze» da û her wiha bi wergerên ji ermenî û rûsî di rojname û kovarên Ermenîstanê yên wêjeyî da ji sala 1958a û vir da hatine çapkirinê. Berhemên wî yên lîtêratûra bedewî weşanên kurdî yên bi radiyoyê jî xemilandine. Novêl û wergerên Wezîrê Eşo yên lîtêratûra bedewî, bi tayîbetî bîranînên wî ser Erebê Şemo di berevokên berhemên nivîskarên kurd da jî hatine çapkirinê, ku salê carekê bi navên « Bahara teze » û « Bahar » li Yêrêvanê salên 80î û 90î hatine weşandinê.

Hetanî niha ev pirtûkên Wezîrê Eşo yên berhemên lîtêratûra bedewî, zaniyariyê û wergeriyê hatine çapkirinê : «Mizgînî » (Yêrêvan, 1976), «Xebera dosta » (berevoka novêlên nivîskarên ermenî bi pêşgotin û wergera ser kurdî), «Dengbêj kal bibû » (Yêrêvan, 1983), «Xaçatûr Abovyan, Kurd, Êzdî » ; werger, pêşgotin, pênasîn û pêradanok yên Wezîrê Eşo (Yêrêvan, 1986) ; «Pamp-Sîpan » (Yêrêvan, 1986) ; «Dosya Barzanî sandoqa Stalîn ya polayî da » (bi kurdî, Hewlêr, 2007, bi wergera ser erebî : Hewlêr, 2008) ; «Pariyê berdemayî » (Hewlêr, 2008) ; «Kurdzanê mezin Qanatê Kurdo » (Bilxaristan, 2010) ; «Zargotinzanê kurd yê mezin » (bi ermenî, Yêrêvan, 2010), ev pirtûk ser jiyan, kar û barê Heciyê Cindî hatiye nivîsandinê; «Simoyê Şemo: jîyan û kar » (bi kurdî, Yêrêvan, 2013).
14 pirtûkên nivîskar û zaniyarên kurd û ermenî bi pêşgotinên Wezîrê Eşo hatine weşandinê, ku her yek ji wana wek xebat, lêgerîneke zanyarî tê dîtinê. Bilî wan gelek gotar û raporên wî yên bi tayîbetî ser pirsên kurdzaniyê û ser kurdzanan, ser dîrok, wêje û çanda Kurdên Yekîtiya Sovyîtiyê û Ermenîstanê bi şiklê lêkolînên zaniyarî di berevok, rojname û kovarên Ermenîstanê, Rûsyayê, welatê Awropayê û Herêma Kurdistanê ya fêdêral da bi kurdî, ermenî, rûsî, almanî hatine çapkirin. Çend heb ji wana raporên zaniyarî ne, bi kîjanan Wezîrê Eşo beşdarî konfêransên zaniyarî li eyînî welatan bûye.

Weke rojnamevan-pûblîsîst Wezîrê Eşo ji nîveka salên 50î yên sedsala buhurî û vir da deng daye. Bi sedan gotarên wî di rojname û kovarên Yekîtiya Sovyêtiyê ya berê, welatên Awropayê û Kurdistanê da hatine weşandin, di malperên kurdî da hatine belavkirin, bi giranî yên ser dîrok û jiyana Kurdên Sovyêtistanê ya çandî. Em îdî derheqa wan komêntar, şirove û nivîsên wî da nabêjin yên ku bi radiyoya Yêrêvanê bi zimanê kurdî, lê usa jî ermenî û rûsî, hatine weşandin.

Wezîrê Eşo bi sedan sêmînarên ser dîroka Kurdistanê, bi tayîbetî tevgera azadîxweziya kurd, ser wêje û çanda kurdî, ser kurdzanînê li Ermenistanê û piştra li welatên Awropayê, nemaze Bêlcîka û li Herêma Kurdistanê, bi cî anîne.
Pirtûkên çend nivîskar û zaniyarên kurd, di nava wê jimarê da yên fêrên ziman û lîtêratûra kurdî bi rêdaktorî, bi serrastkirina Wezîrê Eşo hatine weşandin.

Wezîrê Eşo warê wergervaniyê da jî xizmeta pêşxistina wêjeya kurdî û xwendevanên wê kiriye. Ewî gelek berhemên nivîskarên ermenî yên kilasîk û hemdem yên dûznivîsarê (pirosayê) bi giranî yên ser jiyana kurdî û qehremanên kurd bi wergerên xwe kirine mal û milkê xwendevanên kurd. Bi wergera wî her wisa jî kurteromana nivîskarê rûs yê mezin Arkadî Gayîdar ya bi sernavê « Têmûr û koma wî » beşa pirtûka fêran ya « Zimanê kurdî » ya kirêstomatîk da ya bona sinifa 4a hatiye bi cîkirinê.

Wezîrê Eşo xizmeta şanogeriya kurdî jî kiriye. Di radyoya Yêrêvanê da ew pir salan şîretkarê derhênan bûye di warê amadekirina şanoyên radiyoyê (radiokompozîsiyan) da yên ser bingeha berhemên nivîskarên kurd û ermenî çêkirî. Du şanoyên radiyoyê jî ser bingeha serhatiyên (novêlên) wî bi xwe yên bi sernavên «Tîgran û Mehmûd » û «Koçekê derewîn » hatine amadekirinê (çêkirinê). Lê komêdiya Wezîrê Eşo ya bi sernavê «Remo, Şemo, Temo û lawik» çend salan ser sehna (dika) Têatiroya Elegezê ya kurdî ya gelêrî bi serkeftin hatiye nîşandanê.
Niha ev pirtûkên Wezîrê Eşo li ber çapêne û ji bona weşandinê tên amadekirinê : « Wêjeya kurdî li Ermenîstanê », « Stranbêjê kurd yê mezin Şivan Perwer », « Dîrokzanê kurd yê bi nav û deng Şekroyê Mihoyî », « Doxtirê kurd yê lêgêndî Şîraliyê Eşo», « Kurteroman », « Hûnera kurdî ya stranê û mûzîkayê û qeyîdkirina berhemên wê li Ermenîstanê », « Çapkirina pirtûkên kurdî û ser Kurdan li Yekîtiya Sovyêtiyê » û yên dinê.

Wezîrê Eşo di dawîya jîyan xwe da bi giranî ser lêkolîneke berfireh karê xwe berdewam dikir ya ser kar û barê Barzaniyê Nemir li Yekîtiya Sovyêtiyê ya berê salên 1947-1958a.
Reşnivîsarên bîranînên Wezîrê Eşo, novêl û kurteromanên wî yên nû û çapnekirî têra dagirtina çend pirtûkên stûr dikin.
Wek nivîskar û wergêr Wezîrê Eşo yekemîn ronakbîrê kurde li Ermenîstanê û dervayî sînorên wê bû, ku hêjayî xelata Yekîtiya nivîskarên wê komarê ya bi navê Erebê Şemo (Şamilov) bûye. Ew hatiye hilbijartin weke endamê Yekîtiya nivîskar û Yekîtiya rojnamevanên Ermenîstanê û Yekîtiya Sovyêtiyê. Ji ber kar û barê xwe yê civakî yê aktîf, bi heyacan ew hatiye hilbijartin wek cîgirê serokê Şêwra Ronakbîrên Kurd li Ermenîstanê.

Piştî hatina li Awropayê Wezîrê Eşo kar û barê xwe yê berhemdariyê û civakî berdewam dikir wek endamê Instîtûya Kurdî ya Brûkselê, lê piştra bû endamê Bûroya Kurdî ya Pêwendî û Agahdariyê li eyînî bajarî. Ew her wisa jî hatibû hilbijartinê wek serokê şerefê yê rêxistina Kurdên Kavkaziyayê li Bêlcîka.

Em–heval û hogirên Wezîrê Eşoye pênûsê û maşoqên nivîsarên wî, bi dilkovanî serxweşîyê didine malbeta rehmetî û gelê meyî zêrandî!
Bila serê lawê Wezîrê Eşo, bira-pismanên wî û gelê me sax be!
Em gelê xwe didine bawerkirinê, ku mîrata Wezîrê Eşo ya wêjeyî wê tu caran unda nebe, hemû berhemên wî wê bêne tomarkirinê û çapkirinê!
Bila Rehma Xwedê Wezîrê Eşo be, bila mikanê wî li bûhuştê be!

Emerîkê Serdar, Tosinê Reşîd, Eskerê Boyîk,
Feyzoyê Egît, Têmûrê Biro, Prîskê Mihoyî,
Hesenê Qeşeng, Zurbê Emir, Kinyazê Îbrahîm,
Têmûrê Xelîl, Rizganê Recevî, Keremê Seyad,
Rizganê Simo, Kinyazê Hemîd, Torinê Torinî,
Ezîzê Cewo, Elîxanê Memê, Jênya Qadir,
Firîda Cewarî, Nûra Cewarî, Hesenê Ûso,
Ezîzê Gerdenzerî, Tîtalê Kerem, Mirazê Cemal.

Prîskê Mihoyî

______________________________________

Ya Kurdistan, Ya Neman !

Kurdistan Welatê Kurdaye! Her Bijî Kurd û Kurdistan!

Her bimire terorên li dijê merovatîyê !

Partîya Demokrat a Kurdistan — Xoybun

P D K — XOYBUN

Her bimire terorên li dijê merovatîyê !

Ya Kurdistan! Ya Neman!

______________________________________

Partîya Demokrat a Kurdistan — Xoybun

P D K — XOYBUN

Ya Kurdistan! Ya Neman!

______________________________________

Sonda Mirinê.

“Sonda me mirin e di riya te de welat.

Kefen kirasê me ye ferman lihem li hilat.
Hinc li me miriye ji bo me ma xebat.

Xwîna me hat firotin pê bikirin Kurdistan.

Em dîltiyê naxwazin ji me re rûmettire goristan.

Li ser tirba kuştinê kal û pir digrîne.

Dil kezebê me gişkan tijî xwîn û birîn e.

Xort û law qîz û bûk hemû sond xwari ne.

Xwîna me hat firotin pê bikirin Kurdistan.

Em dîltiyê naxwazin ji me re rûmettire goristan.

Bi lorîka mirinê em hatin pêçandin.
Liyandin şûna şîr em bi xwînê mijandin.

Gazi werin xortno welat çû qedandin.

Xwîna me hat firotin pê bikirin Kurdistan.

Em dîltiyê naxwazin ji me re rûmetire goristan”.

Faîk Bucak

Faîk Bûcak, ne tenê siyasetmedar bû. Helbestvan jî bû. Di hemû helbestên xwe de bang li xort û keçên Kurd dikir. Hêviya wî xort bûn. Helbesta xwe ya navdar “Sonda Mirinê“ ji bo xorten ku canê xwe yê ezîz ji bo welat feda dikin, li zîndanan jiyana xwe ji dest didin nivîsandi bû.