PDK-XOYBUN; wiha, di xizmeta, Kurd û Kurdistanê daye : Pirojeya Kurdistana Mezin, Pirojeyên Aborî û Avakirin, Pirojeyên Cand û Huner, Lêkolîna Dîroka Kurdistanê, Perwerdeya Zimanê Kurdî, Perwerdeya Zanîn û Sîyasî, Weşana Malper û TV yên Kurdistane.

Kesên şanogerê :
1- Kalemêr ; navoser ye
2- Mirin paşa ; sermed
3- Hêvîdar ; sîpe ye

1 - Tîrêja Rok

Kalemêrekî piştexûz, xêzên sal û dem-sala li ser enîya wî hatine kolandin.. tê dîtinê .. datê ji gelî yê çiya ve, û liser piştê ye barek êzing ji qurm û şaxên dara rahiştiye, uftuftê dike di bin barê xwe de, çimkî bihn lê çikiyaye carna di bere dikuxe, û xwêdan ji enya wî qermîçandî diçipe, sor û şîn bûye, dibêje û dibilîne di navbera xwe de, an bi xwe re lavajê dike;

- Xwedawo.. çi rê dirêj bûye îro li min, pişta min di bin vî barî de şkest - ih..ih - xweda ta kengî ezê di bin de bim.. hela ezê vî barî bîskê deynim ji ser pişta xwe û xwe piçikî vehesînim, û bihna xwe berdim li ber vî latî û siya jê kişiyaye.. ]
( barê xwe ji ser pişta xwe datîne erdê, pişta xwe rast dike û xwêdanê xwe vedimale. )

- Bi rastî barê min ne gîrane pirî wek berê ye, lê belkî ez kal û pîr bûme, qeda bi pîrîyê û kata wî keve, û her wiha kes alî kesî nake, û zivistana me dirêj û dijware, û zarok hûrin- biçûkin û pirin, û mal bê agir nabe, çi ji bo min be, çi ji bo firotin û dakij kirinê be, agir jî fêkiyê zivistanê ye, û roniya tariyê ye.. ( kal bi xwe re distirê );

Agir, agir.. hey agir
Kêfkir ê te ji xwer bir
Germ û roniyê dide
Sê çar kenara li vir

- Lê bi rastî.. ev karê mine, her roj serê sibe pê radibim û xwe dikim bin, piştî danheva wan ji vir û ji wir, ji birrîna darên ter û hişk, bi çiya û newala dikevim, bi lat û çara ku barek êzing ji şax û qirşa yan pêlê dara bidim hev û bînim li ser pişta xwe kim, çi bifiroşim û jiyana xwe û zaorkê xwe pê bijînim, û li ber xwe bigerênim, yan jî ji bû kar-malê tivik û tenûrê, ehvî karê zihmet dikim bo kes nebêje ;

- Tirale û bêkêre.

( Hin şax û qîtikan li ber xwe dibîne, radibe dide hev û datîne ser barê xwe, )

- Ger bêjim.. duvdirêje çîroka min, derd û êşan mal û malbata min pirin, tevî hêvî û daxwazên beravêtî, erê xêr û bêra vir pire û ez yan em tevde jê dijîn bi serbestî û serbilindî, xwe û zarokên xwe xwedî dikin bê danek, belê cih serfiraziyê ye çimkî welatê bav û kala ye, jê xweştir tuneye.. û heger bi hindek zehmet-kêşî jiyan dibûre ew jî nexeme..

( Kalemêro bi xwe re distirê û dibêje; )
Welat, welat.. hey welat
Te çi ji mer kir xelat
Derd û êş û kêferat
Dimîne dîsa welat

( Li derdora xwe dinêre, ba û toze, tav û tîrêje, û dîsa bi xwe re lavaj dike;)

- Êh, êh.. dawiya peyvê nayê, bextê me reşe, û qirdê me kore, ne bela meye.. ha, ma qene ' xwedawo ' ji destê meye ev, na Welleh.. na. Lê ez çi bêjim bê fêdeye.. dem li hev vedigere, di me de derbas dibe û li me dizîvire bi çewtî..

Dem, dem.. hey dema buhirtî
Dem, dem .. dema ji beravêtî
Dem kengî berxedan roja felat
Dem û dem dema bêkêr nehatî
.
- Erê baro gotin bê fêdeye, bê fêdeye, bar li vire û rê li ber mine, û hêza min li gorî mine, bi rastî baro.. ez bûme mîna gayê di dengê de li dora xwe dizîvire, ta bi kengî ev..? ez bi xwe vê nizanim, ku ev azar û bext-reşiya çewt li dûv min be.

( Kalemêro pir keser û axînên kûr vedide; )

- Ax mirin, mirin dermanê mine, rawestim û vehesînim ji dunyayê, heger mirin bihata wê min xilaskira ji vê azarê, ji ramanên reş, û bûyerên reştir ;

- Hey mirin, kengî bimrim û ji xwe re xelas bim, îdî ne gilî û ne gazin diman, de ka zû were bi min ve bû dereng, roj bûye nîvê rojê an ro çûye ava.. de ka were lo..?!

Mirin, mirin.. hey mirin
Çi derdê dilêm pirin
Tu li kuye ka were
Li bendê te ez mirin
Terel-la terela la
Terel-la terela la
Tirm tirm.. lelela

2- Tava Heyvê

Ji nişkave kesek tê, mîna reşikekî - liber kalemêr şipya rawistiya, ji ezman daket an erd qelişî û jê pengizî, ne çek sipiye ne jî reşe, ya rast li wê nîvêye ; ew kiras û cibe cûne, rih dirêje di rengê kiras û cilê wî de ye, ji rengê riwê wî ye, tenê bejin tenik û zirave, dest dirêje û ew jî bala kalemêr kişand, tu dibêje qene xwe cendike di tevgera xwe de, niza ne di meşiya ne difiriya .. e..

+ Va me ez .. lo birako, kî bang dike min ez dibêjim; Ê Libê.. li ber destê te me, ev ezim bi qilaft û laşê xwe, bi deng û arşena xwe, kî banke min; ez amade me û diyarim, ne dûrim ji kesî, kî li bendî min be va ez hatim, çimkî :

kî rêwî be ez hevalim
kî şiyare ez li balim
kî razaye ez qeyalim

.. Tu bi xwe birako.. çi ji min dixwazî ?, dawaza xwe carek din bêje, da ezî bi cih bînim, bidime te, libê.. li ber destê te me..!?

- Ê.. Ê bese, te min tirsand bi vê der-ketina xwey ji nişkave, qene tu kiye gelo..ha ?.Ê dengê xwe hilde jiber guhê min girane.

+ Ez mirinim, ruh stînim.. rewana ra-diwestînim ..

- Heh, ê te go çi, mirin bi xwe, he ha hî.. ( kalemêr piçekî dimizce û dikene, paşê dikeve tev ji saw û tirsa ji hundirê xwe û ji derve bi kesê li ber rawestiyaye ) mirin bi xwe, ez bawer nakim bi xwedê, neyse.. tu çi dike li vir çi ye karê te, û tu çi dixwaze..?, de ka bêje..

+ Qene ehwa zû te xwe jibîrkir. Ma ne te şand dûmin .. hevalo,!!? qene min ji tilya xwe ne bihna bû, ez liser deng û banka te hatime, û di xizmeta te de me û tiştê ji min dixwaze ezê ji te re bi cih bînim.. ya rast hatime bi cih bînim û hew..

- Heh, ê te çi got, Bi xwedê ez nizanim ev bûyer çawa li vir çêdibin, rewrewkin li ber çavê minin an sawêrin li hişê min dibin..!? ji westandinê ye an ji kêmbûna nêrîna çava ye û ji kerbûna di guhê min de ye..

+ Vaye ez liber çavê te me bi qelafetê xwe, ez hatime daxwazê bi cih bikim û wek tu dizane ez kolakî fermana bicih tînim bê tiştekî min têde hebe, de ka bêje tu çi dibêje..?

- Wilo.. Te çi got ?, ê çima mere bang li hin tiştên din dike û tu kes bi me ve nayê..?! ehwa zû û bilez ji me re nakin, mîna bextyarî û serkeftin û çima pir hêvî û omîd hertim beravêtî dibin û tu kes nabêje çiman, ev çi du bendînî çewtin .

+ Her yek û riya wî, her yek bi awakî karê xwe dike û xebata xwe dibe serî, û va ez hatime ser sozê xwe; ruhstênim, de min dereng neke.. jiber karên min pir hene .

- Heh, ê te çi got..?, Ruhstînê çi.. kê qala ruhstînê kiriye, û ji bû çi.. heh ?!

+ Ji bû çi?, ji bû çi te bandikir min û digot;

Mirin, mirin .. hey mirin
Tu li kuye ka were
Li bendê te ez mirin

( Kalemêr matmay ma û hin xêzên tirsê liser riwê wî xuyakirin, û bi dengekî şkestî got;
- Min bang li kesî nekiriye.. birako, bi rastî tu şaşe yabo..

+ Dengê kê bû îca, heger ne dengê te bû, te bi xwe ji min xwest ez bêm û vaye ez hatime karê xwe bikim, û ez xweş dizanim bi karê xwe.. û bes xwe bide virde û wirde..

- Na.. na ezbenî na, min tiştek navê ji tu kesî, û herger min bang li te kiriye – wek tu dibêje – ew tu alî min bike û barê min hilde ser pişta min - heger tu karibe ji comerdiya xwe, dîsan barê min li ser pişta min rast bike, yê bi ser salê xwe de dinale..

+ Çilo.. û çawa .. ha..

- De ezbenî li min ke, barê min bavêje ser pişta min, de ka alî min bike bi xêra xwe.. bê çare ye.. ev (dawer)qedera mine ta temen kuta bibe ta dawî. De ka destê te loo.. û dev ji qerwela berdin.

( Mirin bi ber de dikişe û xwe amadedike alîkarê kalemêr bike, devê xwe diqermiçîne û destê xwe ji hev vedike mîna ; çî min jêye?! )
+ Bese.. eve daxwaza te, wek tu divê, bi rastî hîna temenê te xilas nebûye di erşena cîhanê de, lê.. li ser daxwaza te ez hatim bi te ve, ku qenciyekê bi te bikim, û wek bi Kurdî dibêjin ; ( xwestin dane.) te min xwest û min xwest bidim te tiştên te xwest.

- Heh, ê te çi got..?. Na bavo na, qenciya te ji min re navê, hetanî xwedê çarekê bike û kulika çarekê veke, û hespekê nêr ji me re bişîne.!

Kalemêr xwe qulûz dike û xwe dide ber barê xwe, û mirin-padîşah barê êzingan li ser pişta wî rast dike.. û pêre dibe teqteqa kenê wî .. ta deng li hev belawela li wan car û çiyan.

+ He ha hî, ev daxwaza te ye.. û hew, de xwedê bi te re be, he hahî ..

3- Çirûskên stêra

Kalemêr hêdî hêdî di bin barê xwe de dimeşe li nav wan car û newala, uftuft pêketiye, û bihn lê çikiyaye, xwêdan ji enya qermîçokî diçipe, xemgîn û hejare.. awaza bêdengiyê li ser serê wî bûye ewrekî cûn.

Wisa ji wêde lawê wî ' Hêvîdar ' tê pêşiya wî ku alîkarîyê pêre bike, bo riya dirêj û dijwar..

- Ha kurê min va tu hatî bi min ve, de heydê em bi hevre herin.. wê şeveq zû ne dereng, wê bi me ve bê.

Ciwanê Abdal

Kurdistan Welatê Kurdaye - Her Bijî Kurd û Kurdistan
http://www.pdk-xoybun.com
http://www.xoybun.com/extra/slide/Unbenannt-2.swf

http://www.pdk-xoybun.com/nuceimages/Newroz_Kurdistan_PDK_Xoybun_x1.jpg

http://www.pdk-xoybun.com/nuceimages/Nexise_Kurdistane_PDK_b.jpg