PDK-XOYBUN; wiha, di xizmeta, Kurd û Kurdistanê daye : Pirojeya Kurdistana Mezin, Pirojeyên Aborî û Avakirin, Pirojeyên Cand û Huner, Lêkolîna Dîroka Kurdistanê, Perwerdeya Zimanê Kurdî, Perwerdeya Zanîn û Sîyasî, Weşana Malper û TV yên Kurdistane.

PİRA SERXWEBÛNÊ - PİRDÎ SERBEXOYÎ
DUHOK, 30. 09. 2005 — Bajarê Duhokê bi festîvala rewşenbîran ya 1ê, ku di 22-24.09.2005an de hate pêkanîn sînorên ku dijminan di navbera me Kurdan de bi destê zorê danîne çirandin.

Bajarê Duhokê rûpeleke nû di dîroka me de vekir. Festîvala Duhokê di bin çavdêriya ( sîwana ) rêzdar Temer Remezan parêzerê Duhokê de pêk hat. Parêzerê birêz Temer Remezan di pêvajoya festîvalê de bi hemî derfetên xwe demek gellek bi kêf, bi me rewşenbîran daye derbas kirin. Me bi saya wî û bi saya azadiya Kurdistanê çend rojan tama azadiyê li ser axa xwe bi eşq û coşeke mezin derbas kir. Yekîtiya Nivîskarên Duhokê hemî quweta xwe dabû vê festîvala pîroz. Her derên bajarê Duhokê bi van peyvên ku “Peyva Kurdî sînoran dibezîne, Qelema azad azadiyê peyda dike, Nivîskarên Kurd hilgirên nasnama neteweyî ne û hwd hatibûn xemilandin. Hêjayî gotinê ye, ku serokê Yekîtiya Nivîskarên Duhokê birêz Hasan Slêvanî bi nav bikim, ku keda wî di vê festîivalê de nayê gengeşî kirin. Birêz Hasan Slêvanî ji wan rewşenbîrên Başûrê Kurdistanê ye, ku mirov dikare wek nimûne bi tiliyan nîşan bide. Ew di pirsa neteweyiya Kurd û Kurdistanê û di pirsa pêwendiyên di navbera hemû perçên Kurdistanê de roleke serke, rola pireya pîroz dilîze.

Bê guman wisa ne hêsan e, ku mirov wan sê rojên festîvala Duhokê di goterekî de bi çend gotinan bi cih bike. Vê festîvalê li ser min bandoreke ( tesîreke ) pir mezin hîşt. Çimkî ev cara yekem e, ku ez ji seranserê Kurdistanê û ji derveyî Kurdistanê ewqas rewşenbîran bi carekê bi hev re dibînim.

Vê festîvala Duhokê jî careke din ji bo me daye îspatkirin, ku êdî dewran ji bo Kurdan hatiye guhertin û tîrêna me birê ketiye, ku ti hêz û quwet nikare vê tîrenê bide sekinandin. Ev tîrên, tîrêna serxwebûna Kurdistanê ye, ku gelê me bi sedê salan bi wê hisretê ye, van rojan bibîne. Em bi wan leheng û qehremanên Kurdistanê şanaz û serbilind in, ku rûmeta gelê Kurd li hemberî dijminan parastin û Başûrê welatê me rizgar û azad kirin. Bi festîvala Duhokê bingeha pira serxwebûna Kurdistanê hate avêtin. Îlana serxwebûna Kurdistanê ne dûr e. Jixwe ne azadî bê serxwebûn dibe û ne jî serxwebûn bê azadî. Ezê di demên pêş de bi berbifireh li ser axaftina serokê Kurdistanê birêz Mesût Barzanî, ku di roja 23an de hat û ji me re axaftine dîrokî kir, bisekinim.

Min di Hotêla jiyan de delîve dît û ji serokê birêz re got, ku ewî heta niha li ser Başûrê Kurdsitanê di qada navneteweyî de rola xwe baş lîst. Lê jê hêvîdar û bawer im, ku ewê li ser perçên Kurdistanê yên din jî rola xwe baş bilîze.

DUHOK, 30. 09. 2005

FÛAD SÎPAN ( AKPINAR )
fuadsipan@yahoo.de